#farouj

The past couple days on the twitter had a number of Lebanese initiated hashtags trend worldwide, the latest was #farouj and another was #smabeirut and while the first was @ralphsaade ‘s idea and somehow was one of its kind although most tweets were such as “WTF?! #farouj is trending?” or “why is #farouj trending?!?”

The second #smabeirut (social media awards beirut) grabbed the Lebanese twitter community’s attention because it involved voting… And while many people voted, most Lebanese (including myself) went on the website to see the nominees… And I’m sure the vast majority did the same…

Actually, lol :$  to be honest i voted twice…

Once in the blog of the year category, voted for hummusnation and once for @mishoricha for most creative instagram account and while hummusnation deserves in my opinion the title of that category, misho who is my friend does not in any way deserve to win the most creative instagram account category but i voted for him anyways because I want him to win it and thus allow us to mock the whole thing..  hehe (no offense misho)

I mean most categories included people and organisations who were clearly not deserving and I wonder how the organizers think they can gain credibility this way..

In a future post I’m going to be handing out my own social media awards, stay tuned because my version includes special categories that starts with:
(الأكثر اثارة للمتاعب على تويتر)

and doesn’t end with:

(صاحب أقوى سحسوح على تويتر)
Please use the comment box to suggest any special category you’d like to nominate someone for or simply have it included in the awards.

Ali 😀

40 ألف

 

رئيس الوزراء: سني.. واحد من احتمالين… إذا راضي عنو تيار المستقبل بكون كويس وإذا لأ بكون تابع لحزب الله وإذا كان هيك أو هيك.. بدو يكونوا راضيين عنو السعودية وأميركا وفرنسا وايران وسوريا وإذا توافرت كل الشروط.. مجبور يحط معادلة الجيش والشعب والمقاومة بالبيان الوزاري…

وزير الداخلية: أضرب وظيفة بلبنان… تتحصل علىيها بدك تمضي تعهد انك قبلان مين مكان يمسح فيك الأرض

وزير الدفاع: مابهم الدفاع.. المهم ماتجيب سيرة تسليح الجيش… عفكرة مافي قاعدة بلبنان أصلا مش شغلتك كوزير دفاع تحذر من القاعدة

وزير المالية: أهلين.. لازم تكون معك مصاري هيدي أول شغلي.. وسواء الحكومة لحزب الله أو ل  14 اذار  وزير المال بدو يكون حريري.. (ناعم يعني) وما بيسأل كتير أسئلة.. خصوصي عن الماضي…

وزير الطاقة: شو بدك بهالشغلة… انت مش انت.. خصك ماخصك… بسببك مش بسببك… كل ماتروح الكهرباء امك وأختك مع طوني خليفة السبت عشية…

وزير العدل: زئّيف… (صفّيق يعني) ببلد عاصمتو ام الشرائع مفروض تكون أهم وزير.. بس للأسف  70 % من اللبنانيين مابيعرفوا إنك موجود

وزير الشباب والرياضة: اجمالا حصة أصغر مكون للحكومة… ماحدا بيرغبها… بس الكل بصير يمدح بأهميتها ساعة يلي بدو يلبصوها لحدا.. ملاحظة: مجبور تحضر مباريات المنتخب

وزير الاعلام: عادةً.. عادةً…. مفروض تكون شاطر بالعربي.. بمأنو وظيفتك محصورة بقراءة  مقررات الحكومة بعد كل جلسة…بس مؤخراً.. ماضروري… بس اجباري تكون بارد.. وبطييييييء لحتى إذا شي مرة قطشوا ماتش فوتبول أو باسكت تيحطوك كل العالم تسبلك…

وزير الصحة: يمكنلك من الوزارات القليلة جدا… أكرر جدا… يلي مافيك كتير تنكت عليها… عم تعالج هالعالم عقد قدرتها.. بس علاج المواطنين مش لازم يكون منية من الدولة… العلاج المجاني لازم يكون من أبسط الحقوق المدنية بلبنان

وزير الإتصالات: شو ماعملت مش منيح… بدك أهلا وسهلا مابدك الله معك… رخّص بقلولك غالي… طوّر بقلولك رجعي… سرّع بقلولك بطيء… يمكن اللي بخليك تكفي هو إنك عارف مش قاصدين اللي بقولوا وضميرك مرتاح

وزير الثقافة: شارك لبنان بمؤتمر لوزارات الثقافة بالشرق الأوسط صار بتركيا… قاعد الوزير اللبناني عجنبو الوزير التركي… كونو لبنان غني عن التعريف من هالناحية (الثقافة).. كل دولة صارت تعرض انجازاتها.. التركي قال انو نحنا منفتخر انو عنا صار 300 000  موظف تابعين لوزارة الثقافة التركية… المهم بعد شوي هو وعم يحكي وزير مدري أيا دولة… بيسألو الوزير التركي لوزيرنا انتو كم واحد بوزارة الثقافة بلبنان؟ هلق أول مرة وزيرنا طنش… وتاني مرة طنش عمل حالو مش سامع… تالت مرة انجبر يرد.. فقلو 40… تعجب الوزير التركي قلو والله برافو.. 40 ألف لبلد نسبيا صغير متل لبنان كتير منيح… قلو وزيرنا لأ مش 40 ألف… 40 شخص.. ماضروري خبركن كيف برم وجو وما عاد عبر الوفد تبعنا..

وزير التربية: شغلتك تقرر ايمتى الامتحانات… بس؟ إيه بس… أصلا زلمة وعراف ايمتى… لول…

وزير الزراعة: الحمدلله هيدا القطاع الوحيد يلي مابيتأثر شو ماصار بالبلد… أحلى وزارة.. بس لو بيعملو مشروع قانون بشرعوا زراعة الحشيش… ساعتها اخت البترول عاخت اللي بدو ينقب عنو… منصير أغنى دولة بالمنطقة…

وزير السياحة: عادة وظيفته محصورة ببيان واحد بيطلقو صوب نيسان – أيار بحذر من امكانية تراجع عدد السياح بلبنان السنة مقارنة بالسنين الماضية. بس اخر سنتين بحكم الأزمة السورية… قاعد لا شغلة ولا عملة… في وبلاه السياحة ماشية

وزير العمل: هيدي لازم يحطو فيها حنا غريب… عن عطول…

وزير الخارجية: أذكى انسان بالبلد… برأيي أهم من رئيس الجمهورية… خصوصي انو المواطنين يلي تحت سلطته عالقليلة مرتين أكتر… غير هيك.. الزلمة بدو يوفّق بطريقة معيّنة بين كون لبنان مقاوم وممانع… بين كون لبنان ضعيف ومعتدل… وبين كونو نائي بنفس..

وزير الصناعة:  لول… كمالة عدد…. (نو أوفنس) الا إذا معتبرصناعة الألبان والاجبان وعلب السردين مفخرة…

وزراء الدولة: تكملة عدد ليصير في تلت وتلتين و 6 و 6 مكرر

يا زلمة؟ مابتقدم هالغنية؟

علي جانبين

شكرا كوريا

من يوم يومي بكره المقدمات.. مش كرمال شي بس لان شو ما تكون عم تقرا, على طول المقدمة كذب.. يعني الكاتب بيبقى حايص مش عارف شو يكتب ليرغبك تكمل قراية فبيكتب حيالله شي.. اجمالا كذب او مبالغة تيجبرك تقرا صلب الموضوع.. يعني ان اظر ووردز متل ما عملت انا هلق صرلكن ساعة عم تقروا وبعد ما عندكن فكرة شو موضوع النص..

عال.. اختصرنا..
اليوم بقطر انعقدت القمة العبرية على مستوى الرؤساء..

 بحضور معظم الزعماء العرب..
افتتح الطبل القمة..  ودخلكن ليش بسموها قمة؟
انو بوتين – اوباما قمة…
نجاد – بوتين قمة..
دول ال 5 + 1 قمة..
صيني مع برازيلي قمة..
فرنساوي مع الماني قمة..
بس مع احتراماتي يعني, صالة فيها الطبل ومرسي وسلطان عمان وزعيم دجيبوتي ومحمود عباس وسعودي وبحريني وكويتي ولبناني وسوداني فوقاني وتحتاني وحدا من جزر القمر وسلفي من تونس واماراتي وجزائري وعراقي ويمني وموروكاني واردني وصومالي مش قمة.. اذا شي.. مطلع نكتة طويلة مش اكتر.. نكتة بايخة

ليصيروا قمة.. لازم يكون في زلم بيناتن..
كان بينن زلمة اسمو صدام.. بغض النظر عن رأيي في..  تواطؤوا مع الامركان ضدو وقتلوا..
كان بينن زلمة اسمو قذافي.. بغض النظر عن رأيي في.. تواطؤوا مع الامركان ضدو وقتلوا..
والزلمة الوحيد المتبقي لغولوا مقعدو..

وبتعرفوا شو الحلو؟ انو هيدا مش رايي الشخصي.. هودي الامركان والغرب كلو هيك نظرتهم..

 

على كلن منرجع للنكتة..
انو دخلكن على شو معظمينها انو عطوا المقعد السوري للمعارضة السورية؟
يعني لو بالعادي بطلعوا قرارات مصيرية وحاسمة.. كنا زعلنا.. بس ما هيدا بعدنا عم نقلكن..  اجتماع نكتة مش اجتماع قمة..
شو متوقعين يعني منو للطبل..؟ انتوا معكن خبر انو عمل انقلاب على..  وايت فور ات…  على بيو!  ايه عمل انقلاب على بيو تيوصل للحكم..

جشع..

قطر لازم يغيرولها اسمها يسموها جشع..  اللي ما بيعرف معناتها يشوفها بالمعجم..
المهم هلق خلاصة الحديث..
النكتة العربية بايخة كتير.. ورغم هيك من يوم ما خلقت بضحك العالم..

الله يشبع العرب.. والله يعين العرب على هالسنة يلي رح تترأس فيها جشع النكتة العربية..

 

آه إيه.. ونعيما جشع على ال 2-1 بتصفيات كأس العالم

ملاحظة: ورد في اول المقال عبارة “القمة العبرية” ( مقصودة) — أيضا الأخ في الصورة المصحوبة بالمقال كوري (مقصودة كمان)  لذلك اقتضى التوضيح

ملاك صغير

من يومين كنت راجع من بيروت على بيتي عشية..

بعدنا كنا على السفارة الكويتية عالدوار.. عجقة كالعادة.. ناسينغ نيو..

شفت بيك أب محمل عفش بيت أو عالقليلة أشياء من الحقل المعجمي تبع بيت…

كان في براد.. سجادة.. 3 فرش اسفنج.. كنباية.. كرسيين خشب.. مخدات.. طاولة.. وعيلة 7 أشخاص…

صدقوا… البيك أب كان محمل كل هالأشياء ومعها عيلة 7 أشخاص.. زلمة ومرتو عايدها في رضيع وزلمة كبير بالعمر وصبي وبنت أعمار متوسطة وبنت صغيرة مابتتخطى الخمس سنين…

إيه.. حفظتن كلن..

لأ.. مش لأنو طولنا بالعجقة بس لأنو حفظت تعابير وجهن كلن…

الزلمة عم يتطلع بالسما عزة نفسو مش سامحتلو يتطلع بوجوه العالم… مرتو عم تتطلع في بحسرة وضو سيارتنا عم يلمع بدموع عيونها…

الختيار وضعو مابيسمح يوقف.. قاعد لاقي على عصاه وحدو حفيدو وحفيدتو.. عم يتفرجوا عالسيارات.. عولاد متلن فيها..

بقي البنت الصغيرة.. بنت سبحان اللي خلقها.. بتقول ملاك صغير… مش فاهمة شي من يلي عم يصير… عم تلوح للسيارات… وتبتسم لكل حدا فيها برد السلام…

السلام يلي أهلها عم يحلموا في… سورية البنت… قصدا نسيت قلكن انها سورية… مش لأنو مابتفرق… بالعكس لأنو ببلدنا وللأسف.. كتير بتفرق…

مهجرين من الحرب ببلدهم… متلنا من كم سنة… وعلى الأرجح متلنا بعد كم سنة… مابدها ذكا تتوقع هالشي…

بس للأسف وضعهم الاجتماعي مابيسمحلهم يتحملوا تكاليف العيش الكريم بلبنان… بـلبنان البخيل…

مابعرف شو كانت وجهتهم… مش أكيد أصلا انو كان عندهم وجهة… تعابير وجهن كفاية تافترض هالافتراض…

قال شو.. بالمدرسة كان يضلوا يقولولنا يشتهر لبنان بكرم أهله… يمتاز اللبنانيين عن باقي الدول بأنهم شعب مضياف… لول

يا عيب الشوم… حسيت حالي عاجز… مشي السير وكملنا عالبيت… بس صورة هالعيلة كملت معي…

لعند ماشفت  تقرير عالتلفزيون عن اللاجئين السوريين بلبنان…

مقابلات مع لبنانيين اجريت في الشارع… السؤال كان “شو رأيك بظاهرة السوريين بلبنان؟”

خليني أول شي قول تفه عالحمار اللي قرر يعمل هالتحقيق ويتبنى هيدا السؤال… “ظاهرة”

هودي كم جواب من شعبنا المضياف.. علقوا براسي…

صبية عشرينية: “ييييييي متليين الدني.. وين ماروح بتفركش فيهن”

امرأة مع صديقتها: كتير زودوها…” بترد رفيقتها “عم نقرف نضهر من بيتنا”

طفل: “سوريي سوريي يفلو بقى من عنا”

رجل: ” رح يصيروا أكتر منا”

شاب: “أنا ماعندي مشكلة بس مش عم نلاقي صفة بالحمرا”

ولك يا عيب الشوم… (مع العلم انو ماكان في ولا تعليق ايجابي بين يلي نعرضوا بالتقرير)

معليش للذكرى هون بس…

بحرب تموز.. مليون لبناني راحوا على سوريا…

أكل وشرب ومسكن وطبابة وترفيه وكهربا ومياه… برجع بكرر لمليون شخص… مادفعوا ولا ليرة…

يا عيب الشوم بس مش أكتر…

عنا هون.. الأوتالات مفولة.. الشقق مفولة… بأضعاف أضعاف الأسعار العادية… المطاعم والمقاهي وكل المراكز السياحية والاقتصادية عم تشهد انتعاش بعمرو ماصاير قبل…

عشو عم تنقوا؟ منيح يلي مش فاتحين بيوتكن متل ماهني عملوا…

منيح يلي مش عم طعموهم عحسابكم متل ماهني عملوا…

منيح يلي مش مقعدينهم بفنادقنا ببلاش متل ماهني عملوا…

منيح يلي مش عم نحكمهم ببلاش متل ماهني عملوا…

يا عيب الشوم…

شعب حقير… لو عدوك كان ضعيف ولجألك… لازم تأوي.. كيف إذا شعب فضلو مش بس كبير عليك… فضلو كبير عحريتك وعلى استقلالك

بعرف في كتار هيدا الكلام مش موجه الهم…

بس للأسف يلي بينطبق عليهم هيدا الكلام كمان كتار…

أخيرا.. بتمنى كلامي يكون للعبرة.. مش للذكرى.

علي جانبين